Հանքարդյունաբերությունը սպառնալիք է Սյունիքի համար

Հանքարդյունաբերվող Սյունիքի իրական պատկերը «Հայաստանի կոտրվող ողնաշարը» տեսաֆիլմում`https://www.youtube.com/watch?v=YrrDz…
Այս տեսանյութը դուք չեք գտնի համացանցում, քանի որ YouTube.com կայքում տեղադրվելուց ընդամենը մի քանի ժամ անց այն հանվել է կայքից՝ մեզ անհայտ պատճառներով։ Ամիսներ առաջ «ԱՐ» հեռուստաընկերությունը ներկայացրեց Սյունիքի մարզում հանքարդյունաբերության հետևանքով առաջացած աղետալի վիճակը լուսաբանող հաղորդում, որից հետո այն տեղադրվեց նաև համացանցում։ Սակայն ժամեր անց տեղադրված տեսանյութը անհետացավ համացանցից։ Ամենայն հավանականությամբ` պետական կամ մասնավոր որոշ օղակներ ջանք չեն խնայել, որ այդ տեսանյութում ներկայացված փաստերը հասանելի չդառնան հանրության լայն շերտերին։ Բարեբախտաբար, տեսանյութը ներբեռնվել է համացանցից, և փոխանցվել Համահայկական բնապահպանական ճակատի (ՀԲՃ) անդամներին, ինչի շնորհիվ հնարավորություն ունենք այն ներկայացնելու ձեր ուշադրությանը։

Սյունիքում իրականացվող հանքարդյունաբերական գործունեության ու դրա առաջ բերած բնապահպանական, առողջապահական և սոցիալական խնդիրների մասին պատմող փաստագրական տեսանյութ պատրաստվել է նաև Համահայկական բնապահպանական ճակատի անդամների կողմից, որի առաջին հանրային ցուցադրությունը տեղի ունեցավ ս/թ. հոկտեմբերի 8-ին Երևանում, իսկ այնուհետև նաև Լոս Անջելեսում, Վաշինգտոնում և Նյու Յորքում: Հայաստանում և նրա սահմաններից դուրս գործող համալսարաններում և կրթական օջախներում, Հայաստանի մի շարք մարզերում և Արցախում ցուցադրվելուց հետո ՀԲՃ-ի պատրաստած տեսաֆիլմը` վերնագրված «Հայաստանի կոտրվող ողնաշարը», նույնպես հասանելի կլինի համացանցում: